Góðu Grannakaffi stuðlar

Leygarkvøldið 27. mars skipar Krabbameinsfelagið fyri stóru landsinnsavningini ”Føroyar móti krabba”, sum verður send í Kringvarpi Føroya beinleiðis úr Norðurlandahúsinum.

Krabbamein rakar okkum øll – so ella so. Ikki øll  gerast sjúk, men øll eru avvarðandi. Foreldur, børn, maki, familja, vinir, starvsfelagar. Nógv hava mist, og nógv hava yvirlivað. Tað munnu vera fá í Føroyum, sum ikki hava kent sviðan av krabbameini.

Leygarkvøldið 27. mars viðurkenna vit hetta. Tá fara allar Føroyar at standa saman, móti krabba. Vit fara at stuðla Krabbameinsfelagnum, so tey kunnu halda áfram at hjálpa, ráðgeva, upplýsa og stuðla gransking.

Í sendingini verður borðreitt við góðum tónleiki, forvitnisligum innsløgum, undirhaldi og áhugaverdum samrøðum. Vit fara m.a. at hitta sjúklingar, avvarðandi, granskarar og starvsfólk, sum dagliga taka sær av teimum avbjóðingum, sum krabbamein gevur.

Leygarkvøldið 27. mars kl. 19.00 verður eitt gylt høvi at samlast í stovuni framman fyri sjónvarpið, njóta sendingina og stuðla Krabbameinsfelagnum.

Um tit ynskja at skipa fyri tykkara egna Grannakaffi/innsavning í samband við “Føroyar ímóti krabba”, ber til at venda sær til krabbameinsfelagið og fáa bússur.  Sjálvandi ber eisini til at stuðla við at gera eina flyting á konto hjá Krabbameinsfelagnum:

• Bank Nordik: 6460 - 618.088.6
• Betri Banki: 9181 - 551.502.7
• Norðoyar Sparikassi: 9865 - 323.088.5
• Suðuroyar Sparikassi: 9870 - 304.242.2

Tit gera sjálvi av nær tykkara Grannkaffi verður. Um tit filma ella taka myndir frá tykkara innsavning og leggja á sosialu miðlarnar, ber til at nýta frámerki #FMK2021, á hendan hátt verður tað atkomuligt fyri alt Føroya fólk og tit eru við til at seta sjóneykuna á krabbamein og tað arbeiðið Krabbameinsfelagið gerð fyri krabbameinssjúk og teirra avvarðandi.

Vinarliga

Krabbameinsfelagið