Enn kvinna – hóast krabbameinssjúku

Ein filmur við kvinnum, sum hava havt krabbamein.

At fáa staðfest krabbamein er ofta ein ógvuslig uppliving. Tað er sum um teppið verður rivið undan tær, har lívsgleðin og lívsmótið kunnu verða hótt. Sjúkan og viðgerðin kunnu taka hart uppá teg, og tað kann taka langa tíð at fóta tær aftur.

Identiteturin og sjálvsuppfatanin kunnu eisini ávirkast. Nógv hjáárin standast av viðgerðini og tað er ikki óvanligt at vera móð og troytt, umframt missa hár, brýr og eygnavippur. Húðin gerst bleik, litleys og útsjóndin broytist. Hetta kann vera við til at ávirkað lívsgóðskuna.   

Tí er gott at fáa hjálp, ráð og vegleiðing, bæði kropsligt, sálarligt og sosialt. Eisini kunning og undirvísing í hvussu tú kanst røkta húðina og leggja make-up. Læra at tekna eygnabrýr og leggja farvur, so tú sært frískari út. At gera nakað gott fyri teg sjálva, taka ímóti hjálp og teimum tilboðum sum finnast, kann vera við til at lyfta teg upp, og økja um tína vælveru og lívsgóðsku.

Tað er Lake Film, ið hevur gjørt filmin, ið er stuðlaður av Krabbameinsfelagnum og Body-Shop.