Eingin krabbameinssjúkur nýtist kenna seg einsamallan
Krabbameinssjúka hevur við sær ógvusligar broytingar, sum kunnu raka sera meint. At fáa so álvarsama sjúku tætt at lívinum elvir ofta til nógvar spurningar um tilveruna, um meiningina við tí heila og kann fáa ein og hvønn at kenna seg einsamallan og máttleysan.
Krabbameinsfelagið er landsfevnandi felag, sum áhaldandi virkar fyri at betra umstøðurnar hjá krabbameinssjúklingum í Føroyum. Við okkara ráðgevingarstovu vilja vit vera tey, sum altíð eru til reiðar at møta tær, har tú ert, lurta eftir tínari søgu og saman við tær finna útav, hvussu vit kunnu hjálpa tær.
Serkøn ráðgeving
Krabbameinsfelagið hevur tveir ráðgevandi sjúkrarøktafrøðingar í starvi við drúgvum royndum innan krabbameinsøkið og sum eisini hava tætt og gott samband við bæði sjúkrahús, Heimatænastuna, hvíldarheim og aðrar viðkomandi stovnar í og uttan fyri Føroyar. Tær vegleiða og ráðgeva tær ókeypis, hava telefonviðtalu, bjóða persónligar samrøður á ráðgevingarstovuni ella heima, um tú heldur vilt tað, eins og tær eisini hava samrøður við familjur og avvarðandi. Tær kunnu stuðla og hjálpa tær at fáa yvirlit yvir tína støðu og seta orð á ta ørkymlan og sváru kenslur, ið ofta eru, tá ið krabbamein kemur so tætt at lívinum.
Øll kunnu ringja og fáa eitt prát við okkara ráðgevar, ella koma inn á gólvið til eina ókeypis samrøðu. Vit hava eina røð av tilboðum at bjóða, sum til dømis:
- Einstaklingasamrøður
- Familjusamrøður
- Rørslutiltøk
- Onnur tiltøk, sum eitt nú hugnakvøld, fyrilestrar
- Ymiskar samrøðubólkar og samveru við onnur í líknandi støðu
- Ráðgeving um sosial, arbeiðs- og rættarlig viðurskifti
Tilboðini eru fyri øll, sama hvar tú býrt í landinum.
Samvera styrkir
Kanningar vísa, at tað loysir seg at vera saman við øðrum og práta og deila sínar upplivingar og tankar við onnur í líknandi støðu. Krabbameinsfelagið hevur tí eisini bólkar fyri bæði avvarðandi, krabbameinssjúklingar, sorgarbólkar fyri hjúnarfelagar og bólkar fyri foreldur ella vaksin børn. Harafturat eru fleiri bólkar fyri ávísar krabbameinssjúkur, som sjálvboðin taka sær av.
Endamálið við bólkunum er at stuðla hvør øðrum, tosa um tankar og kenslur og í trúnaði práta um tað, sum er tungt at bera einsamallur. Umvegis ráðgevingarstovuna hjá Krabbameinsfelagnum ber eisini til at koma í samband við tey, ið sjálvboðin hava skipað seg í hjálparbólkarnar. Sí meira um bólkarnar her
Hitt okkum
Ljóðar hetta sum nakað fyri teg, ella ivast tú? Ring 317959, ella send okkum ein teldupost til kmf@krabbamein.fo og sig okkum tína søgu, so finna vit útav, hvat vit kunnu hjálpa tær við. Vit svara telefonini mánadag til fríggjadag frá klokkan 13.00 til 15.00.
