Ert tú sjúk/ur av krabbameini og ætlar tær uttanlanda at ferðast?

Tað er gott at tosa við lækna og avvarðandi heilsustarvsfólk um at tú ætlar tær at ferðast uttanlanda. Tey kunnu ráðgeva og vegleiða tær í hvussu tú kann ferðast hóast tú ert sjúk/ur og í hvat tú skal hugsa um áðrenn tú fert avstað og meðan tú ert og ferðast.

Avboðstrygging:

Tað kunnu verða treytir galdandi, ið gera at tú ikki kann fáa endurgjald, um tú ikki kann fara avstað vegna sjúkuna. Tí er tað sera umráðandi at seta seg í samband við títt tryggingarfelag áðrenn tú keypir tær eina ferð uttanlanda.

Ferðatrygging:

Tað er sera umráðandi at fáa eina greiða frágreiðing frá avvarðandi tryggingarfelag um hvussu tú er tryggjaður tá tú ert burtur.Tað er ymsikt hvørji krøv tryggingarfeløgini seta til tína heilsustøðu áðrenn tú fert at ferðast og í nógvum førum er ikki gjørligt hjá fólki, sum eru álvarsliga sjúk, at fáa trygging. Set teg tí í samband við títt tryggingarfelag og kannað hvat er galdandi fyri júst teg og tína støðu. Um títt tryggingarfelag sigur at tað er í lagi at tú fert at ferðast er umráðandi at fáa eitt skriv har tað stendur júst nær, hvar, hvønn og hvat tryggingin fevnur um og eisini tað tryggingin møguliga ikki fevnir um.

Altjóða viðurskifti - Heilsutrygd

Heilsutrygd dekkar ikki uttan fyri Føroyar, men landsstýrismaðurin í heilsumálum kann gera sáttmálar við onnur lond um veitingar. 

Hvussu eru føroyingar dekkaðir uttan fyri Føroyar annars? 

Allir føroyskir krabbameinssjúklingar kunnu trygt ferðast í Norðurlondum og í Stóra Bretlandi sambært millumlanda sáttmálum um veitingar í samband við sjúku. Niðan fyri kann tú lesa ymsu kunngerðirnar um veitingar í samband við sjúku í Danmark, Norðurlondum og Stóra Bretlandi.

Í Danmark:
Føroyingar hava rætt til sjúkrahjálp í Danmark sambært kunngerð nr. 565 frá 29. apríl 2015. Kunngerðin kann lesast her. 

Í hinum Norðurlondunum: 
Í hinum Norðurlondunum hava føroyingar rætt til sjúkrahjálp v.m. sambært “Nordisk Konvention om social sikring”, sum kann lesast her.

Í Stóra Bretlandi: 
Í Stóra Bretlandi hava borgarar í Føroyum rætt til bráfeingis sjúkrahjálp á sama støði, sum borgarar í Stóra Bretlandi. Hesi rættindi eru staðfest í grein 14 í  “The Convention made in London of 27. august 1959 between The Kingdom of Denmark and The United Kingdom.” Kunngerðin kann lesast her.

GG! Tað er umráðandi at hava í huga at hesi rættindi bert er galdandi í samband við sjúku. Hetta kemur ikki í staðin fyri eina ferðatrygging. Ein ferðatrygging fevnir um mangt annað enn sjúku, burturmist ferðagóðs, stuldur, seinkingar, rættarhjálp o.a., íð kann hava ávirkan á tína ferð, er ikki fevnt at millumlanda sáttmálunum, ið eru nevndir omanfyri.