Nýggj Krabbameinsætlan fyri Føroyar varð handað landsstýrismanninum í heilsumálum á vári 2022. Aðalmálið við ætlanini er, at størri áherðsla á fyribyrging skal minka um títtleikan av krabbasjúkum, og at betri viðgerðartilboð skulu tryggja, at fleiri blíva frísk ella kunnu liva leingi við sjúkuni.
Talið av krabbameinstilburðum hevur verið vaksandi seinnu árini. Í Krabbameinsætlanini fyri Føroyar verður sipað til gransking sum vísur, at talið av staðfestum krabbatilburðum er vaksið frá sløkum 200 í 2007 til upp móti 250 tilburðum í 2019. Talið av teimum, ið doyggja, hevur tíbetur ikki hevur fylgt við, men hevur flestu árini ligið rættiliga støðugt um 100 árliga. Samstundis hevur gongdin verið tann, at tað eru munandi fleiri, ið nú liva fimm ár eftir, at sjúkan varð staðfest. Føroyar eru tó framvegis ein eftirbátur samanborið við onnur Norðurlond, tí tað eru uppaftur fleiri í okkara grannalondum, ið eru á lívi fimm ár eftir, at sjúkan varð staðfest.
Í Krabbameinsætlanini fyri Føroyar eru 69 tilmæli, sum fevna um m.a. herd átøk ímóti royking, screening fyri tarmkrabba og víðkað tilboð um screening fyri lívmóðurhálskrabba, endurmenning av krabbameinssjúklingum, einfaldari ávísingarskipan, endurnýggjan av viðgerðartólum, raðfesting av palliasjón og nógv annað.
Somuleiðis var mælt til at seta eitt Krabbameinsráð, sum skal ráðgeva, hvussu og í hvørjari raðfylgju tilmælini í Krabbameinsætlanini skulu setast í verk. Krabbameinsráðið hevur latið landsstýriskvinnuni sítt fyrsta tilmæli og í hesum verður mælt til at raðfesta fýra tiltøk í 2023. Eitt av hesum tilmælum er at seta í verk eina nýggja ávísingar- og útgreiningarskipan (við útgreiningareind) og hevur landsstýriskvinnan í hesum sambandi biðið Sjúkrahúsverkið seta ein arbeiðsbólk. Arbeiðssetningurin hjá bólkinum var soljóðandi:
Sjúkrahúsverkið er biðið um at seta ein arbeiðsbólk at gera eitt tilmæli um, hvussu ein nýggj ávísingar- og útgreiningarskipan – í samsvari við krabbameinsætlanina – kann verða sett í verk í Sjúkrahúsverkinum. Tilmælið er, at arbeiðið verður gjørt í samráð við kommunulæknaskipanina. Í tilmælinum eigur at verða gjørd ein tíðarætlan og kostnaðarætlan av at seta eina nýggja ávísingar- og útgreiningarskipan í verk. LES MEIRA HER.
