Hjálparbólkar
Tá tú fært staðfest krabbamein er vanligt at hava nógvar spurningar. Tørvurin á upplýsing, vitan, stuðli og hjálp kann vera stórur.
Tað er gott at fáa nógva og góða hjálp frá familju, vinum og fakfólki. Okkara royndir vísa, at tað harafturat hjálpir at hitta onnur í somu støðu og sum hava kent sjúkuna á egnum kroppi.
Tí bjóðar felagið tær at koma í samband við tey sjálvbodnu í teim ymsu bólkunum hjá felagnum. Hesi hava fingið upplæring at veita stuðul, ráð og vegleiðing til onnur í somu støðu.
Endamálið við bólkunum er at ráðgeva og stuðla fólki, sum hava ella hava havt krabbamein og fullum trúnaði práta um tað, ið er tungt at bera.
Endamálið er eisini at bólkarnir gera tað møguligt fyri onnur at koma saman at tosa, stuðla og hjálpa hvør øðrum, veita hjálp til sjálvhjálp við tað at bólkarnir skipa fyri ymiskum socialum tiltøkum, so sum hugnaløtum, Opið hús, fyrilestrum, útferðum o.ø.
Samband við limir í bólkunum fæst við at venda sær til Krabbameinsfelagið á telefon 317959 ella umvegis teldupost kmf@krabbamein.fo
Eisini ber til tekna teg til hugnaløtur, fyrilestrar ella onnur tiltøk, ið bólkarnir skipað fyri og sum verður lýst og kunnað um á heimasíðuni ella facebook síðuni hjá felagnum.
- Bróstkrabbabólkurin Bót til Bata - bólkur fyri kvinnur, ið hava ella hava havt bróstkrabba ella undanstig til bróstkrabba
- Undirlívsbólkurin - bólkur fyri kvinnur, ið hava ella hava havt undirlívskrabba ella undanstig til undirlívskrabba
- Stomibólkurin - bólkur við fólki, ið hava fingið lagt tarm ella bløðru á síðuna ella hava bekkenreservoir
- Foreldrabólkurin - fyri familjur at børnum, ið hava ella hava havt krabbamein
- Móðurmerkjabólkurin - bólkur fyri fólk, ið hava ella hava havt móðurmerkjakrabba
- Prostatabólkurin - bólkur fyri menn, ið hava ella hava havt prostatakrabba
- Lip- og lymfødembólkurin - bólkur fyri fólk við lipødem og lymfødem
