Leygarkvøldið 27. mars kl. 19.00 skipar Krabbameinsfelagið fyri stórari landsinnsavning undir heitinum “Føroyar móti krabba” í Kringvarpi Føroya.

Vit fara at borðreiða við framúr góðum tónleiki, áhugaverdum innsløgum, undirhaldi og forvitnisligum samrøðum frá kl.19.00 til 22.00.

Krabbamein rakar okkum øll – so ella so. Ikki øll gerast sjúk, men øll eru avvarðandi. Foreldur, børn, maki, familja, vinir, starvsfelagar. Nógv hava mist, og nógv hava yvirlivað. Tað munnu vera fá í Føroyum, sum ikki hava kent sviðan av krabbameini.

Leygarkvøldið 27. mars viðurkenna vit hetta. Tá fara allar Føroyar at standa saman. Móti krabba. Vit fara at stuðla Krabbameinsfelagnum, so tey kunnu halda áfram at hjálpa, ráðgeva, upplýsa og stuðla gransking.

Vit vóna, at vit við hesum skrivinum eggja feløgum og fyritøkum at veita stuðul til innsavningina og verða við til at gera mun.

Til ber at stuðla soleiðis:

Flyt pening inn á konto hjá Krabbameinsfelagnum:

• Bank Nordik: 6460 - 618.088.6
• Betri Banki: 9181 - 551.502.7
• Norðoyar Sparikassi: 9865 - 323.088.5
• Suðuroyar Sparikassi: 9870 - 304.242.2

í seinasta lagi hósdagin 25. mars, soleiðis at flytingin er skrásett áðrenn "Føroyar móti krabba" verður send.

ella

Ring til tín peningastovn leygarkvøldið 27. mars í tíðarskeiðnum meðan "Føroyar móti krabba" verður send, og avtala flyting við peningastovnin. Peningastovnurin boðar síðani okkum frá um flytingina og vit syrgja fyri, at hon verður skrásett á lýsingarbreddanum.

Allar upphæddir á 10.000 kr og yvur, koma á lýsingarbreddan á skerminum við navni á stuðlinum. Um ynski er, at stuðulin er dulnevndur, vinarliga tilskila hettar greitt í flytingini, ella tá ið ringt verður inn.

Um spurningar ella viðmerkingar eru til “Føroyar móti krabba” eru tit vælkomin at seta tykkum í samband við Krabbameinsfelagið á telefon 317959 ella á kmf@krabbamein.fo

Vinarligar heilsanir, Durita Tausen Forkvinna fyri nevndina í Krabbameinsfelagnum