Vikuskiftið 5.-6. mars í 2016 varð árliga "Grannakaffi" hildið, og á leið 100 vertir kring landið lótu dyrnar upp fyri fólki og vóru vertir fyri afturvendandi innsavningartiltakinum hjá Krabbameinsfelagnum. Ein teirra var Elinborg Apol, sum býr í Havn. 

"Vit vóru júst flutt inn í grannlagið í Varðabú og hugsaðu, at hetta var eitt gott høvi at heilsa uppá okkara nýggju grannar" sigur Elinborg, sum síðani sendi eina innbjóðing heim til allar grannarnar og til felags Facebook bólkin, sum grannalagið hevur. Familja og vinir vórðu eisini boðin, og tá ið av tornaði, vóru gott 30 fólk til Grannakaffi heima hjá Elinborg og teimum. Hóast plássið heima er avmarkað, so er tað ikki avgerandi fyri, um tiltakið heppnast ella ikki, heldur er tað óformella samskiftið millum grannarnar, sum myndaði tiltakið henda leygardagin, heldur Elinborg: "Summir grannar kennast væl frammanundan, meðan onnur ikki hittast so ofta, men fyri okkum, sum nýliga eru flutt í grannalagið, var tað sera jaligt at fáa eitt prát við okkara nýggju grannar,” sigur Elinborg og leggur afturat, at grannarnir tóku so væl undir við tiltakinum, kanska tí at í skundmikla gerandisdegnum hava vit ofta lyndi til bara at koyra framvið og geva okkum ikki stundir at práta við hvør annan. 

Elinborg setti sær fyri, at tiltakið skuldi vera einfalt og kjarnin í øllum skuldi vera spontana og óformella prátið millum grannar og vinir, og júst hetta heppnaðist væl. Sjálvandi krevur tað nakað av fyrireiking, men ein ger sjálvur av, hvussu umfatandi tað verður. Bússan stóð í inngongdini saman við bókini "Okkara millum", sum henda dagin varð brúkt sum eitt slag av gestabók. Heldur enn undirhald og marglætiskøkur hugsaði Elinborg meira um, at hesir tímarnir saman við grannunum skuldu verða myndaðir av góðum práti og nærveru. "Tað er skjótt at ein kann fáa eitt sindur av avriksótta, tá ið ein sær, hvussu umfatandi summi tiltøk eru við framførslum og undirhaldi av ymiskum slag," sigur Elinborg, sum tó ikki læt seg ávirka av, hvussu onnur skipa sítt Grannakaffi, men helt fast í tann leist, sum riggaði best fyri húskið í nýggja grannlagnum í Varðabú.