Grannakaffi við leskiligari køku frá KOKS-kokkinum

 

Í ár fært tú uppskrift til eina leskiliga kaku, sum ofta stendur á borðinum heima hjá høvuðskokkinum á vælumtóktu matstovuni, KOKS. Ein klassisk fronsk kaka, clafoutis, sum Poul Andrias Ziska og unnusta hansara, Rakul Ingolfsdóttir, hava sett sín egna dám á. Upprunaliga stavar bulurin í uppskriftini frá Instagram-vanganum hjá Christel Pixi, og so hava Rakul og Poul Andrias bygt víðari upp á hana.

 

-Eg elski at gera dessertir, tá eg eri til arbeiðis, men við hús er tað mest Rakul, sum stendur fyri bakingini, sigur Poul Andrias.

 

Tað, honum serliga dámar við júst hesari køkuni, er tann góði konsistensurin, og at hon kann gerast í fleiri variantum við at brúka ymiska frukt, m.a. blommur, rabarbur og kirsiber.

 

Um orsøkina til, at tey nú lata yndisuppskriftina til Grannakaffi, sigur Poul Andrias:

 

-Øll kenna onkran ella fleiri, ið eru ella hava verið rakt av krabba – og tað gera vit eisini. Vit vilja fegin hjálpa Krabbameinsfelagnum, tí vit halda, at tey gera eitt gott arbeiði, og tí at krabbi er ein sjúka, ið vit øll onkursvegna koma at merkja fyrr ella seinni. So um vit kunnu hjálpa bara eitt lítið sindur við at lata eina uppskrift til Grannakaffi, so eru vit ógvuliga fegin um tað.

 

 

Clafoutis a là Poul Andrias og Rakul

Ein klassisk fronsk kaka, ið kann gerast á nógvar ymiskar mátar. Hendan útgávan er gjørd við romm-súltaðum blommum, men kann eins væl gerast við berum ella rabarbum, ið mong munnu hava í havanum. Mann kann saktans brúka tey frísk - og ikki súltað - sum í hesi uppskriftini.

 

Kakan (til 8 kakustykki)

100 g. sukur

3 heil egg

115 g. smør

130 g. hveitimjøl

2,5 dl. mjólk

½ tsk. vaniljuekstrakt (vit brúka eina heimagjørda, men tú kanst saktans brúka eina keypta)

Uml. 300 g. blommur

 

• Hita ovnin til 190 stig. Smyr ein springform ella tertuform við leysum botni við smøri.
• Koyr mjólkina og smørið í eina grýtu og set hana yvir lágan hita, til smørið er smeltað.
• Píska eggini og sukrið saman, til tað gerst ljóst og lætt. Tá sukrið og eggið eru pískað væl saman, sílar tú mjølið í og blandar, til ongir turrir mjølklumpar eru í - blandingin skal vera einsháttað. Rør nú mjólkina/smørið og vaniljuekstraktina spakuliga í, og rør til blandingin aftur gerst einsháttað deiggj.
• Deil blommurnar javnt í formin og stoyt deiggið yvir tær. Baka í ovninum í 30 til 40 min., til kakan er lætt gylt og næstan heilt føst í miðjuni.
• Lat kakuna køla.
• Av tí at hendan kakan líkist meira eini pannukøku í konsistensi, dámar mær væl at koyra karvaðar mandlur ella annað slag av nøtum yvir hana fyri at fáa bit í hana, og so servera hana saman við súrróma.

Væl gagnist 😊

 

Sí súltulaka og vaniljuekstrakt niðanfyri.

 

Romm-súltulaki til blommur

300 g. sukur

3 dl. vatn

2 dl. romm

1 stk. vaniljustong

1 stk. stjørnu-anis

Skal frá hálvari appilsin

 

• Koyr sukrið og 1 dl. av vatni í eina grýtu og karamelisera sukrið, til tað gerst gylt.
• Stoyt restina av vatninum og rommið yvir heita karamellið og lat kóka við loki, til karamellið er upployst. Koyr síðan vanilju, anis og appelsinskal í og lat smákóka í 5 min.
• Køl lakan og stoyt yvir blommurnar. Blommurnar skula súltast í minst 4 vikur, áðrenn tær kunnu nýtast.
• Umráðandi er, at grýtan er heilt rein, og at tú ikki rørir í grýtuni, tá tú gert karamell, tí annars kann tað skjótt koma fyri, at karamellið krystalliserast. Eisini er umráðandi, at súlti-glasið er reinsað við atamon, áðrenn blommurnar koma í.

 

Vaniljuekstrakt

8 vaniljustengur

5 dl. vodka

 

• Kloyv vaniljustengurnar í helvt og koyr tær í eitt hóskandi lítið glas, soleiðis at tú fært allar 5 dl. av vodka í glasið, og tað toppar vaniljuna.
• Lat tað trekkja í 4 til 6 vikur, áðrenn tú brúkar av tí. Ekstrakið gerst bara sterkari og sterkari í smakki, jú longri tað stendur. Um tú hevur brúkt nógv av tí, kanst tú altíð toppa glasið upp við meira vodka. Minst bara til eisini at koyra vanilju í 😊