Reglulig fyribyrgjandi kanning fyri lívmóðurhálskrabba
Kelda: LS
Allar kvinnur í aldursbólkinum 25-60 ár fáa bjóðað regluliga fyribyrgjandi kanning fyri lívmóðurhálskrabba. Hetta verður gjørt við einari einfaldari kanning hjá kommunulæknanum. Endamálið er at diagnostisera forstig til lívmóðurhálskrabba og kunna veita viðgerð skjótast gjørligt.
Um lívmóðurhálskrabba
Krabbamein í lívmóðurhálsinum rakar oftast kvinnur í bestu árum, og tað kemur meira enn so fyri hjá ungum kvinnum eisini. Kyknubroytingar kunnu vera til staðar leingi, áðrenn tær broytast til veruligt krabbamein. Tað ber til við einari einfaldari kanning hjá kommunulæknanum at taka eitt sindur av slími við lívmóðurmunnan til kanningar fyri kyknubroytingar. Leingi áðrenn nakað sæst við berum eygum, kunnu vera broytingar í kyknunum, sum bert síggjast við sjóneyku. Tí verða kvinnur í nevnda aldursbólki vanliga innkallaðar triðja hvørt ár.
Hvør kann kannast
Allar kvinnur í aldursbólkinum 25-60 ár fáa innkallingarbræv frá Landssjúkrahúsinum triðja hvørt ár við eini áminning um, at tíð er til nýggja kanning hjá egnum kommunulækna. Tú ringir sjálv til kommunulæknan og biður um eina tíð. Hevur tú ikki fingið innkallingarbræv, eigur tú at ringja til Landssjúkrahúsið á tel. 304500 og biðja um patologisku deild. Har skalt tú gera vart við, at tú ikki fært innkallingarbræv.
Hvussu gongur kanningin fyri seg?
Kommunulæknin skavar eitt sindur av slími við lívmóðurhálsmunnan við eini lítlari bust. Tú fært ikki ilt av hesum. Í slíminum finnast kyknur. Kyknuroyndin verður send til patologisku deild á Hvidovre sjúkrahús til kanningar.
Hvussu fært tú svar?
Svarið verður sent aftur til tín kommunulækna og avrit til patologisku deild á Landssjúkrahúsinum. Tú og kommunulæknin avgera hvussu tú fært svarið.
Hvat vísur svarið?
Normalar kyknur
Tær flestu kanningar vísa normalar kyknir. Tað merkir at tú fært bræv við áminning um nýggja kanning triðja hvørt ár.
Sí innkallingarbræv 3. hvørt ár her
Óegnað kyknuroynd
Tað merkir, at ov fáar kyknir vóru í royndini, ella at tilfarið varð ov blóðugt. Kanning má í slíkum føri gerast av nýggjum.
Sí innkallingarbræv um nýggja kanning, orsakað av ikki nøktandi tilfari her
Kyknubroytingar
Tá víkja kyknurnar frá tí normala, og síggja øðrvísi út. Orsøkin kann verða bruni, irritatión, eftir føðing ella annað.
Slíkar broytingar verða býttar upp í undanstigini: lætt, miðal og høgt stig. Hesi stig kunnu krevja ávikavist hálvt ára kanning hjá kommunulækna, 1 ára kanning hjá kommunulækna ella kanning hjá gynækologi. Við kanning hjá gynækologi sendir kommunulæknin eina ávísing til Landssjúkrahúsið.
Sí innkallingarbræv viðvíkjandi 1/2 - 1 ára kanning her
Ivast tú í, nær tú seinast hevur verið til kanning, ber til at ringja á tel. 30 45 00 til Landssjúkrahúsið og spyrja teg fyri, biðj um Patologisku deild, lokal. nr. 5604.
Kvinnur uttanfyri aldursmarkið kunnu altíð sjálvar biðja kommunulæknan um at verða kannaðar fyri kyknubroytingar í lívmóðurhálsi.
Meir um screening
Meir um screening fyri lívmóðurhálskrabba kann lesast á hesum síðum hjá Landssjúkrahúsinum, Sundhedsstyrelsen og á Region Hovedstaden
