Harður opningur
Krabbameinssjúklingar hava ofta harðan opning, at dragast við. Orsøkin til henda ampa er avgerðandi fyri, hvussu hann verður viðgjørdur. Harður opningur kann koma av sjúkuni ella av viðgerðini. Harður opningur kann vera eitt hjáárin av ymiskum pínustillandi heilivági. Tað kann eisini ávirka opningin, at tú hevur ringan matarlyst, etur og drekkur ov lítið, og at tú rørir teg ov lítið.
Tey vanligastu ráðini móti hørðum opningi eru at eta mat við nógvum tægrum, men hetta er ikki ráðiligt í øllum førum. Tú mást tí tosa við sjúkrasystur, kostráðgeva ella lækna og biðja um ráð. Groft breyð og knekkbreyð, frísk frukt og frískt grønmeti og turkað frukt er sunnur matur, sum kann geva tær allar tær tæðrur, ið tær tørvar.
Drekk nógv og et tægrutan mat
Drekk nógv, 2 litrar av vætu dagliga. Minst til at drekka millum máltíðirnar. Tú mást eisini royna at økja um innihaldið av tægrum í kostinum. Groft breyð, blakbreyð, frísk frukt, frískt grønmeti (rátt ella kókað). Turkað frukt hevur væl av tægrum. Súrmjólkaúrdráttir (t.d. jogurt) er gott fyri magan. Royn við sviskudjúsi ella nøkrum súpuskeiðum av sáðum í súrmjólk. Sviskur kunnu eisini nýtast - turkaðar ella sum greytur. Turkað frukt, t.d. abrikosur og rosinur, eru góðar fyri opningin, eins og havragreytur ella breyðsuppa á morgni. Tú kann eisini gera eina serliga marmulátu, ið hjálpir upp á opningin (sí uppskrift niðast).
Rør teg so nógv sum gjørligt
Øll rørsla er góð fyri sodningina. Gakk ein túr hvønn dag, sjálvt um tað við hvørt bert er innandura. Liggur tú í songini, kanst tú lyfta beinini skiftivís, ella taka hendurnar upp undir knæið og lyfta tað upp móti bringuni. Stendur tú við síðuna av songini, royn so at lyfta annað knæið ella ger knæbendingar.
Regluligir toiletvanar
Regluligir toiletvanar kunnu fáa magan at virka sum vanligt. At fáa sær ein heitan munn ein hálvan tíma, áðrenn tú vanliga hevur opning, kann vera ein góð hjálp.
Góð ráð tá opningurin er harður
• Drekk nógv, minst 2 litrar um dagin – drekk ikki søtmjólk.
• Drekk súrmjólkaúrdráttir (AB- mjólk, drekkijogurt).
• Et groft breyð og kornvørur.
• Et fríska frukt, fruktsalat, turkaða frukt (serliga sviskur),grønmeti og ber.
• Rør teg so nógv sum til ber.
• Hav regluligar toiletvanar.
Uppskrift upp á marmulátu, ið hjálpir upp á harðan opning
125 g av fikum
125 g av sviskum
125 g av hunangi
125 g av siroppi
45 g av sinnoppsblaðspulvuri (frá apotekinum).
Sviskur og fikur verða settar á blot eina nátt, síðani kókaðar og mulgraðar. Blanda hunang, siropp og sinnopsblaðspulvur í. Byrja á kvøldi við eini barnaskeið. Heldur sær 3–4 vikur í kuldaskápi. Kann eisini goymast fryst.
