Týdningarmestu orsakirnar til húð- og móðurmerkjakrabbamein eru ov nógv sól og sólskáldingar. Eisini er greitt, at sjálvt avmarkað nýtsla av solarium kann vera vandamikil. Fært tú ov nógvar vandamiklar uv-strálur, gerst húðin reyð, og ikki øll vita, at tá hevur tú longu skáldað teg. Tað er langt áðrenn, húðin er vorðin blóðreyð og møguliga hevur fingið bløðrur. Tí er umráðandi at verja seg í sólini - ikki bara uttanlands, men eisini her heima.

Tey trý s-ráðini

1. Skuggi

2. Sólhattur

3. Sólkrem

Skuggi

Sum kunnugt er uv-strálingin sterkast klokkan 12-15. Tað er eisini tá, fólk í suðurlondum halda siesta og fara í skuggan. Ger sum tey og far í skuggan eina løtu og slepp undan nógvu uv-strálingini. Sjálvt um tú ikki ert í beinleiðis sól, fært tú bæði lit og D-vitamin. Gransking hevur nevniliga víst, at D-vitamin verður framleidd upp á minuttir, tá húðin fær uv-strálur, og at húðin eisini framleiðir D-vitamin í skugganum. 

Sólhattur

Ert tú í sólini millum klokkan 12 og 15, er sólhattur við breiðum skugga besti mátin at verja høvd, oyru, nakka og andlit. Eisini eru leys og tættvovin klæði úr bumull góð at verja seg við og køla væl í hitanum.
 

Sólkrem

Smyr sólkrem á umleið 20 minuttir, áðrenn tú fert í sólina. Í londum tætt við Ekvator eigur tú at nýta sólkrem við faktor 30. Smyr við ríkiligum mongdum, annars lækkar faktortalið. Vel altíð sólkrem, sum verjir móti uva- og uvb-stráling. Minst til at smyrja sólkrem á aftur nakrar tímar seinni og, um tú hevur svomið, sveittað nógv, ella turkað tær við handklæði.

Hugsa um børnini

Umráðandi er at ansa væl eftir børnunum í sólini, tí teirra húð er serliga viðkvom. Tað ber væl til hjá børnum at vera úti klokkan 12-15, um tey eru í skugga ella vard við klæðum og sólkremi. Lat tey í klæði, sum koma niður á knæ og albogar. Vát klæði veita ikki somu verju sum turr. Skift tí klæði, um tey eru vát. Pinkubørn eiga tó at verða hildin burtur úr sólini, og tørvar teimum tí ikki at verað smurd við sólkremi.

Við ynski um eitt gott summar

Krabbameinsfelagið