Rørslutilboð og hugni í Suðuroynni

Býrt tú í Suðuroy og hevur fingið staðfest krabbamein, hevur havt krabbamein ella er avvarandið til hesi, so les endiliga víðari!!

Vit eru nevnliga so heppin, at hava bæði gott rørðslu- og samverutilboð í oynni. Hvønn mánadag millum kl. 16-17 hittast vit til munagóða og tillagaða venjing á fysiurgisku deild á Suðuroyar Sjúkrahúsi, har Sára Olsen, fysioterapeutur, skipar fyri.

Deildin er nútímans, við øllum hentleikum, við ljósum rúmligum hølum og hóskandi amboðum.

Um onkur er, sum fegin vil samveruna, ynskir at práta, lurta ella bara hugna sær, men ikki orkar at venja á Suðuroyar Sjúkrahúsi, so er sanniliga enn eitt tilboð til tín og tykkum.

Tvøroyrar Kommuna hevur bjóðað okkum innivist í gomlu og hugnaliga Roykstovuni, miðskeiðis á Tvøroyri, har vit hittast ein tórsdag um mánaðin frá kl. 16.00. Her er altíð kaffi og te á kannuni og altíð er onkur at tosa við og, sum hevur stundir at lurta. Hetta er vanliga ein stak hugnalig løta, har pláss og stundir eisini eru til kortspøl, borðspøl ella stokkar, um hugur er til tess.

Verið vælkomin til rørðslutilboðið við at møta upp á fyriurgisku deild á SS ella við at seta teg í samband við Sáru Olsen á tlf. 221190

Um tú hevur hug at møta til hugnaløtuna í Roykstovuni, so ert tú vælkomin at venda tær til Kristiannu Strøm (tlf. 221255 ), Hildur Túná Fjørdal (tlf. 222057) ella Sáru Olsen (tlf. 221190) fyri at hoyra nærri.