Tá krabbamein rakar, broytist gerandisdagurin, og tey avvarðandi skulu taka støðu til nógv nýggj viðurskifti, bæði praktisk og kensluliga. Mitt í sorgini og stúranini skal makin hjá tí sjúka hava orkuna til at hjálpa, ugga og fáa gerandisdagin at virka sum best. 

Vit vita, at stuðul frá makanum hevur alstóran týdning fyri tann, ið er sjúkur, og at tað eru nógvar avbjóðingar og krøv til makan. Tí bjóðar Krabbameinsfelagið makum at monnum við prostatakrabba at koma í  ein samrøðubólk. 

Vit vita eisini frá royndum, at hóast makin er vorðin sjúkufríur, verður lívið ikki altíð tað sama sum áður. Ofta eru nógv seinárin at stríðast við. Seinárinini ávirka bæði tann, ið hevur verið sjúkur og makan. Virðini kunnu vera broytt, útsjóndin kann vera broytt, orkan kann vera munandi minni, kroppsførleikar kunnu vera mistir, tykkara sosiala lív og umgangur kann verða broyttur og ofta er kynslívið í ein stóran mun ávirkað av árinunum. 

Í samrøðubólkinum kanst tú fáa góð ráð ella bara fáa sett orð á hvussu ørkymlandi tað kann verða at vera maki. Tú fært eitt frírúm til at tosa við aðrar kvinnur, ið vita hvat tú tosar um. At tosa um evni, sum ofta eru tabu at tosa um, undir tryggum umstøðum og í trúnaði.

Bólkurin hittist mikukvøldið 7. oktober frá kl. 19.00 í hølunum hjá Krabbameinsfelagnum á Grønlandsvegi 58 í Havn.

Á skrá hetta kvøldið: Mona við Reiðlið, Lívsgóðska hóast avbjóðingar. Mona er útbúgvin sjúkrarøktarfrøðingur og hevur lisið positiva sálarfrøði.

Hevur tú hug at luttaka, ella hevur tú spurningar viðvíkjandi hesum, kanst tú seta teg í samband við okkum við at ringja 317959 ella senda teldubræv til kmf@krabbamein.fo. 

Boða frá luttøku áðrenn mikudagin 7. oktober kl. 12.00

Vegna bólkin

Johild Ziskason