Sjúkrarøktarfrøðingar lokið útbúgving innan barnapalliatión
Sjúkrarøktarfrøðingar lokið útbúgving innan barnapalliatión
Hansina Mikkelsen og Sólrun Jakobsen, báðar sjúkrarøktarfrøðingar, hava seinasta árið tikið víðari útbúgving innan barnapalliatión á OsloMet universiteti, sum kallast «Tverrfaglig videreutdanning i barnepallition». Hetta er triðju ferð, at henda útbúgving verður útbjóða og fyrstu ferð sum tvørfaklig útbúgving. Hetta er ein serstøk víðari útbúgving sum er stovnsett við tí endamáli, at fyriskipa eitt barnapalliativt tilboð til familjuna við álvarsligum og lívshóttandi sjúkum børnum. Tær hava seinasta árið verið regluliga til undirvísing í Oslo, umframt fjarundirvísing á netinum. Tær eru tær fyrstu sum hava nomið sær víðari útbúgving innan barnapalliatión í Føroyum, tær hava fingið fíggjarligan stuðul til útbúgvingina frá Team Rynkeby Føroyar Grunninum hjá Krabbameinsfelagnum.
Útbúgvingin Tverfaglig videreutdanning i barnepallition tekur høvuðsstøði í familjuni og sjúka barninum frá 0 – 18 ár uttan mun til hvør sjúkan er. Útbúgvingin gevur teimum førleikar at verða ressource persónar í menningini av barnapalliatión í Føroyum, umframt at arbeiða tvørfakligt saman við ymiskum stovnum og tænastum sum eru til taks. Hetta eru arbeiðsførleikar sum stuðla og eru grundarlagið undir at leggja til rættis eina væleydnaða palliativa sjúkugongd fyri álvarsliga sjúka barnið og familjuna.
Tær hava báðar víðari útbúgving innan palliativa økið til vaksin og ynskja við hesari útbúgving at verða við til at menna og varpa ljós á barnapalliatión í Føroyum. Útbúgvingin hevur givið teimum nýggja vitan og førleikar, sum tær vilja nýta til at arbeiða fyri, at tað palliativa økið verður raðfest hægri, og at tað fær tað rúmd og umstøður sum tað eigur at hava, eisini politiskt og heilsufakligt. Tað er av stórum týdningi, at vit sum samfelag í Føroyum kunnu verða á jøvnum føti við londini rundan um okkum, eisini á barnapalliativa økinum, siga tær báðar.
”Við hesum vilja vit takka Team Rynkeby Føroyar fyri stuðulin. Vit eru sera eymjúkar og takksamar fyri tað framúr góða arbeiðið, sum Team Rynkeby Føroyar átakið ger og gevur. Tit øll eru við til at varpa ljós á álvarsliga sjúka barnið og familjuna rundan um og eru samstundis við til at hjálpa ørðum sum okkum, at hjálpa. Vit vilja við hesari útbúgving verða við til at varpa ljós á barnapalliatión í Føroyum” siga tær báðar, Hansina Mikkelsen og Sólrun Jakobsen at enda.
Krabbameinsfelagið ynskir tykkum hjartaliga tillukku við útbúgvingini.