Krabbameinsfelagið verið á vitjan hjá Elsebeth Mercedis Gunnleygsdóttir, landsstýriskvinnu í almannamálum
Á myndini eru Durita Tausen, forkvinna í Krabbameinsfelagnum, Elsebeth Mercedis Gunnleygsdóttir, landstýriskvinna í almannamálum og Jansy Gaardlykke, dagligur leiðari hjá Krabbameinsfelagnum
Krabbameinsfelagið verið á vitjan hjá Elsebeth Mercedis Gunnleygsdóttir, landsstýriskvinnu í almannamálum
Tann 7. januar var Krabbameinsfelagið á fundi við Elsebeth Mercedis Gunnleygsdóttir, landsstýriskvinnu í almannamálum, har Krabbameinsfelagið kunnaði um virksemið hjá felagnum, umframt at vísa á ábøtur, sum felagið heldur eru neyðugar á almannaøkinum.
Tíbetur eru fleiri og fleiri sum verða frísk av krabbameini, ella sum liva leingi við sjúkuni. Tað kann taka drúgva tíð at basa sjúkuni, og tað vísir seg, at galdandi lóggáva loftar ikki tí nóg væl. Undir teimum umstøðunum er fíggjarliga hjálpin til tey nærmastu heldur ikki nøktandi.
Tað er sárt, um tann sjúki og familjan, afturat sjúkuni, eisini fáa álvarsliga fíggjarligar trupulleikar at dragast við.
Tað hevði bøtt væl um, um sjúkudagpeningar kundu verið veittir í longri tíð enn í dag.
Fyri lívsgóðskuna hevur tað eisini nógv at siga at kunnu arbeiða, alt eftir hvør orkan er. Í dag ber til at fáa tillagað starv, men so skal arbeiðsførleikin vera varandi skerdur. Verður tað broytt soleiðis, at tað ber til at fáa tillagað starv í avmarkað tíðarskeið, so kunnu tey, sum hava brúk fyri longri tíð at koma fyri seg aftur eftir sjúku, varðveita tilknýtið til arbeiðsmarknaðin og eisini varðveita fíggjarliga lívsgrundarlagið.
Landsstýriskvinnan greiddi frá, at tey eru í gongd við at gera uppskot til Vælferðarlóg. Uppskotið hevur til endamáls at laga vælferðarskipanina til føroysk viðurskifti. Eins og forsorgarlógin hevur verið, verður Vælferðarlógin niðasta fíggjarliga trygdarnetið fyri teir borgarar, ið ikki sjálvir megna at uppihalda sær sjálvum og sínum.
Krabbameinsfelagið fegnast um tær ábøtur, sum eru í uppskotinum um Vælferðarlóg. Ynski okkara er, at Vælferðarlógin verður so góð, at hon fer at tryggja, at tað fer at bera til hjá fleiri at varðveita sítt arbeiði, umframt at tað eisini slepst undan fíggjarligum smeiti, hóast drúgv sjúka rakar.
Sí uppskot til løgtingslóg um almannatrygd og vælferð (Vælferðarlógin) her.