Málið er at fáa mannfólk at gerast meira medvitin um og betri før fyri at varnast eyðkenni fyri krabbamein. Eisini er málið at fáa menn, sum hava fingið staðfest krabbamein, í størri mun at nýta tey tilboð um hjálp og stuðul, sum eru.

 

Danska Kræftens Bekæmpelse ger saman við PROPA (felag fyri prostatasjúklingar) og Mens Health Week, fleiri átøk um mannfólk og krabbamein í døgunum 15. – 22. juni. Í hesum sambandi er faldari “Mænd og kræft” gjørdur. Hesin kann takast niður á heimasíðuni hjá Krabbameinsfelagnum og við at trýsta her.
 

Stórur tørvur er á upplýsing til mannfólk um krabbamein. Royndirnar sýna nevniliga, at mannfólk í minni mun enn kvinnurnar fara til lækna at lata seg kanna fyri sjúkueyðkenni, ið kunnu standast av ymiskum sløgum av krabbameini, eitt nú krabba í prostata. Áhaldandi hosti, sár, ið ikki lekjast, blóð í landinum ella trupulleikar við at lata vatnið, eru dømi um eyðkenni, sum kunnu standast av krabba, og tí er eingin orsøk til at drála við at fara til lækna. 
 

Í Føroyum eru royndirnar, eins og aðrastaðni, at nógv fleiri kvinnur enn menn leita sær hjálp og nýta tey hjálpartilboð, sum eru fyri tey, ið hava fingið staðfest krabba.  
 

Hjá Krabbameinsfelagnum eru tað á leið 85% kvinnur og einans 15% menn, ið nýta tey tilboð um ráðgeving, felagið veitir. Krabbameinsfelagið setti tí í fjør ljós á mannfólk og krabbamein, og ynskir at gera tað aftur í ár.  
 

 

Fleiri lond seta í viku 25 framljósini á mannfólk og heilsu við Mens Health Week 2009. Meira kann lesast um Mens Health Week á www.sundmand.dk.