Røða

Hey, og takk til Krabbameinsfelagið fyri at bjóða mær her fyri at siga nøkur orð. Til at byrja við, vil eg bara líka siga nøkur orð um meg.

Um meg

Eg eiti Elsebeth og eri 19 ár, og tá eg var 7 mánaðir fekk eg staðfest krabbamein í heilanum og var so í kemoviðgerð í tvey ár. Sjálv minnist eg einki frá hesari tíð, men við hjálp frá pápa og mammu, sum skrivaði eina dagbók ímeðan eg var sjúk, systkjum mínum, sum søgdu mær frá úr einum øðrum sjónarhorni, og nógvum myndum, havi eg fingið heildarsøguna puslaða saman fyri mær.

Hóast kemoviðgerðin varð steðgað, tá eg var 2 ár, so havi eg altíð verið, og eri enn, undir støðugum eftirliti, av tí at svullarnir eru har enn. Og vegna avleiðingum av sjúkuni og viðgerðini, komi eg altíð at vera undir medisinkari viðgerð.

Team Rynkeby

Men, ja, vit eru her jú í dag fyri at siga farvæl við súkklararnar og hjálparfólkini, ið nú fara at súkkla frá Danmark til París fyri at hjálpa børnum, ið hava verið ella eru rakt av krabbameini, og hetta gera tey so við at samla pengar inn fyri tey.

Eg haldi at vit øll kunnu vera samd í, at arbeiðið, sum Team Rynkenby ger, fer til eitt gott endamál. Ein partur av peninginum, verður nýttur sum persónligur stuðul, um eitt barn hevur tørv á tí. Hesin peningur kann hjálpa barninum m.a. um tað hevur tørv á hjálp uttanifrá, eitt nú sálarligari hjálp.

Peningurin, ið Team Rynkenby samlar, fer eisini í gransking. Hetta er eisini nakað, ið hevur ein ótrúliga stóran týdning, tí tað hjálpir ikki bara okkum, men eisini øllum øðrum børnum. Tí við at stuðla granskingini, kann mann minka um tal av børnum, ið andast. Eisini kann hetta hjálpa við at børn ikki fáa krabbameinið aftur, og er eisini við til at gera kemoið betri, so at tað kanska ikki gevur líka nógvar eftirfylgjur sum fyrr.

Eitt týdningarmikið ting, sum Team Rynkeby ger (kanska uttan at tey vita tað), er at gera krabbamein til eitt minni tabu evni. Her og der hevur mann altíð hoyrt um krabbamein, men tað hevur á ein hátt verið eitt goymt umtaluevnið. Krabbameinsfelagið hevur sjálvandi eisini havt ein stóran leiklut í tí, men tað at síggja nakrar gular súkklarar súkkla uttanfyri hevur helst eisini hjálpt til.

Arbeiðið hjá Team Rynkeby hjálpir eisini foreldrabólkinum við at fáa eina betri samveru. Við at skipa fyri ymsum tiltøkum og ferðum. Millum annað kann nevnast ferðin til Edinburgh, jólaborðhaldið á Hotel Hafnia og tiltakið á Føroya Fólkaháskúla. Nógv kom burturúr hesum vikuskifti á háskúlanum, sum Krabbameinsfelagið skipaði fyri. Í hesum sambandi, hevði Krabbameinsfelagið fingið ein danskan familjuterapaut, sum hjálpti okkum at seta orð á ymsar tankar og kenslur.

Við hesum vil eg bara siga við tykkum í TR, at tykkara stuðul og umsorgan hava ómetaliga nógv at siga. Takk fyri, og eg ynski tykkum ein góðan túr víðari.

Á myndini: Elsebeth Mohr Vang og Tórvør Vang. Tórvør hevur súkkla við Team Rynkeby Føroyar øll árini, síðan byrjan í 2014.