Krabbameinsambulatoriið á Landssjúkrahúsinum
Krabbameinsambulatoriið móttekur krabbameinssjúklingar í dagviðgerð og er partur av Medisinska deplinum. Á deildina koma sjúklingar, sum hava fingið staðfest ymsar krabbameinsjúkur.
Upplatingar- og telefontíðir
Gerandisdagar kl. 08.00 - 16.00
Læknaskrivari telefontíð kl. 10.30 - 12.30 á telefon 304599 lokal nr. 6286
Sjúkrarøktarfrøðingur hevur telefontíð mánadag til hósdag kl. 09.00 - 15.00, fríggjadag kl. 09.00 - 12.00 á telefon 304599 lokal nr. 6210
Deildin hevur tvær eindir:
Viðtalueind og Viðgerðareind
Viðtalueindin
Á Viðtalueindini kemur tú til samrøðu við lækna og sjúkrrøktarfrøðing. Serlæknar, sum eru knýttir at deildini, eru onkologar av Rìkissjúkrahúsinum í Keypmannahavn.
Tú kanst tíverri ikki vænta at hitta sama lækna til allar viðtalurnar.
Viðgerðareindin
Á Viðgerðareindini verða ymiskar medisinskar viðgerðir í sambandi við krabbameinssjúku givnar, so sum kemoterapi, blóð og annað.
Á deildini arbeiða seks sjúkrarøktarfrøðingar við drúgvum royndum í onkologi, sum skiftast um at arbeiða á viðtalueindini og viðgerðareindini.
Deildin strembar eftir, at sjúklingarnir mest møguliga hava samband við somu sjúkrarøktarfrøðingarnar.
Tú eru vælkomin at ringja til deildina við spurningum.
Eru tað týdningarmikil viðurskifti, sum hava við tína krabbameinssjúku ella viðgerð at gera, ber til í dagtímunum at verða umstillað/ur til deildina, eisini uttan fyri telefontíðina, við at siga við umstillingina, at tað er týdningarmikið.
Ert tú í viðgerð við kemo og verður akutt ávirkað/ur, tá ið dagdeildin er stongd, skalt tú ringja á Landssjúkrahúsið á telefon 304500 ella møta á skaðastovuni og siga, at tú eru í kemoterapiviðgerð og biðja um at tosa við vakthavandi lækna á medisinsku deild.
Viðurskifti, sum eru týdningarmikil at boða frá, um tygum eru í kemoviðgerð:
- Ússalig/ur, fepur yvir 38.5 ella skjálvti.
- Bløðing
- Trongd
- Ring pína
- Høvuðpína, ørilsi ella sjónarórógv
- Áhaldandi diaré
- Áhaldandi spýggja
Tá ið tú møtir á G3, verður tú biðin um at boða frá við diskin, áðrenn tú fert víðari.
Mælt verður til, at tú hevur ein avvarðandi við, tá ið tú kemur til samrøðu ella viðgerð. Serliga til ta fyrstu samrøðuna, tí ofta verða so nógvir upplýsingar givnir, at ógvuliga nógv er at minnast.
Bíðitíð
Miðað verður ímóti at sleppa undan bíðitíð. Tað eydnast ikki altíð og kann verða grundað á óvæntaðar umstøður ella, at onkur bráðfeingis sjúklingur er komin á deildina.
Fartelefon og telda
Loyvt er at brúka fartelefonir og farteldir á deildini, og atgongd fæst til internetið á Landssjúkrahúsinum ókeypis við at logga á gestanetið hjá LS, ongin kota krevst.
Parkering
Í garðinum framman fyri sjúkrahúsið er loyvt at parkera bilin í 2 tímar. Í leiðbeiningini í forhøllini ber til at fáa fráboðanarskelti, sum loyvir longri parkering, t.d. um tygum skulu hava viðgerð, sum tekur longur enn 2 tímar.
Les meiri um Krabbameinsambulatoriið á heimasíðuni hjá Landssjúkrahúsinum á leinkjuni her.
