Set kross í álmanakkan 26. oktober!

Í dag er altjóða krabbameinsdagur. Dagurin gevur okkum høvi at gera vart við krabbamein, so stóra málið kann verða rokkið: at skapa eina framtíð, har einki krabbamein er.

Á hvørjum ári eru fleiri enn 200 fólk í Føroyum, sum fáa boðini ‘Tú hevur krabbamein’. Nógv fáa tíbetur heilsubót, men alt ov nógv doyggja. Fyri at bøta um hesi tølini, er ógvuliga týðandi at fáa meiri at vita. At granska í krabbameini. Eisini í Føroyum.

Krabbameinsfelagið veitur stuðul at granska í krabbameini. Felagið hevur stuðlað verkætlanum, sum eru lidnar og stuðlar eisini granskingarverkætlanum, sum arbeitt verður við í løtuni. Eisini vita vit, at granskingarverkætlanir eru á veg. Tað ber eisini til at søkja granskingarstuðul frá Team Rynkeby Føroyar og frá Norðurlendska krabbameinsfelagnum. Meiri fæst at vita um treytir o.tíl. við at trýsta her.

At fáa krabbamein, kann raka meint. Tað rakar tey, sum eru sjúk, og eisini tey, sum varða av. Tað rakar okkum øll.

Høvuðsuppgávan hjá Krabbameinsfelagnum er at hjálpa og lætta um hjá teimum, sum hava krabbamein og hjá teimum, sum varða av. Millum annað við persónligum samrøðum, familjusamrøðum, rørslutiltøkum, hugnaløtum og ymsum samrøðubólkum. Hjálpargrunnurin hjá felagnum veitir eisini krabbameinssjúklingum fíggjarligan stuðul.

Krabbameinsfelagið kann stuðla, eina og aleina tí felagið fær stuðul. Tí Føroyar stuðla. Fólkið, vinnan, ja allar Føroyar.

Fyri støðugt at kunna veita stuðul – fíggjarliga, til at granska og ikki minst fyri at veita hjálp, tá ið hart leikar á – verður ‘Føroyar móti krabba’ aftur í ár. Set kross í álmanakkan 26. oktober, tí tá verður tað!